స్వరం మార్చిన ఒక మాట

 

నీతో మాట్లాడలేక....

పెదవి ఒంపుల నుంచి

ఓ వెల్లువై రాబోతున్న

మాటల జల్లు

ఓ వలయం లా వెనక్కు తిరిగి

గుండెలోతుల్లో జారిపోయింది.

ఎవరెవరి కళ్ల మీదుగానో

జారిపోతున్న నిన్ను చూడలేక .....

కనుపాపల చీకటి కొసల నుంచి

జాలువారే ఓ నీటి చుక్క

కళ్లెదుట కాలిపోతున్న కలల్ని చూసి

అలలు లేని సముద్రమై

లోపల్లోపల ఎండిపోయింది.

మాటలు లేని పగళ్ళు,

నిద్ర లేని రాత్రుళ్లు

స్పర్శ  లేని సహజీవనాలు

ప్రేమ లేని అనుబంధాలు

శాంతినివ్వని యుద్ధాలు

ఈ జీవితం ఓ అసంపూర్తి మరణం !

అందుకోసమే ఎదురుచూపులు!!

ఆగస్ట్ 17, 2012   

కల్పనారెంటాల