నది –సప్తపది!

అగ్నిహోత్రం లా నది
చుట్టూ సప్తపది
***
ఒక ఒడ్డున నువ్వు
మరో తీరాన నేను
నది సాక్షిగా నిరీక్షణ
***
వెను తిరిగి వెళ్ళిపోతున్న నువ్వు
నా మీద నుంచి నడిచివెళుతున్న నది
***
నా నదీ దేహం లోకి
నడిచి వచ్చిన పడవ
ఎందుకు వచ్చిందో, ఎందుకు ఆగిందో—
పడవ చేసిన గాయంతో
సుళ్ళు తిరుగుతున్న నది
***
నా పాదాల్ని ముద్దిడుతున్న నది
నా కోసమే విచ్చిన మంచు పూలు
రెండు గట్లతో చెట్టాపట్టలేసుకొని
వచ్చిన వెన్నెల దీపం
జాలరి వలలో చిక్కిన రవి కిరణాలు
అన్నీ నా సొంతమనుకున్నా!
ఎంత పిచ్చిదాన్ని!
నడుస్తూ నడుస్తూ వుండగానే
ఆనకట్ట కౌగిలి లోంచి
ఎక్కడో కాలం జారీ పడిపోయింది
నే చూడనే లేదు!

కల్పనారెంటాల

(వార్త ఆదివారం అనుబంధం 8-3-1998)